الرئيسية » مقالات » مقالات عامه [ إضافة مقالة ]

الوطن والمواطنة والمواطن

بسم الله .. وهدخل في الموضوع على طول .. الواحد بيتولد بدون أي إختيارات , يعني محدش بيختار أبوه أمه أو أهله , يعني انت بتتولد وبتلاقي الأمور دي حواليك وعليك وانت ملزم بيها بغض النظر عن رغبتك فيها , ومن ضمن الأمور إللي ملكش إختيار فيها هى " البلد إللي بتتولد فيها " , يعني مثلا اتولدت في مدغشقر , بلد حلوة أو وحشة , فانت اتولدت فيها , وبتعيش فيها مدة طويلة أو قصيرة , لحد لما بتكبر وتبدأ تتعرف على بلدان العالم , وتتعرف على كوكب الأرض إللي ربنا خلقه للناس كلها , وتبدأ تتعرف على كل بلد إيه ظروفها وإيه أحوالها وتشوف الحلو والوحش فيها من وجهة نظرك , وممكن تلاقي بلد ظروفها أفضل من البلد إللي انت موجود فيها من وجهة نظرك , ماهو كل واحد فينا له إختيارات وله أولويات وإهتمامات مختلفة من واحد لواحد , في واحد يهمه في البلد إللي يعيش فيها جوها أو ظروفها الإقتصادية أو أماكن الفسح والترفيه ... إلخ , فتقرر تروح تعيش في البلد دي , البلد إللي انت وجدت إن ظروفها بالنسبة لك أفضل من البلد إللي انت إتولدت فيها , وتعيش وتستقر وتكون مبسوط ومرتاح , يعني مش شرط عشان اتولدت في بلد معينة تفضل عايش فيها طول عمرك وخروجك منها يبئه خيانة وانك بعت بلدك ووطنك .. وطنك .. حلوة وطنك دي .. طب ما تيجوا نتكلم عن الوطن والمواطنة والمواطن ..
الوطن هو " البلد إللي يتحقق فيها شروط "المواطنة" للإنسان إللي عايش فيها ويطلق عليه "مواطن" .. طب يعني إيه مواطنة وإيه هى شروطها؟ ..
المواطنة هى " العضوية الكاملة والمتساوية في المجتمع بما يترتب عليها من حقوق وواجبات ، وهو ما يعني أن كافة أبناء الشعب الذين يعيشون فوق تراب هذا البلد سواسية بدون أدنى تمييز قائم على أي معايير تحكمية مثل الدين أو الجنس أو اللون أو المستوى الإقتصادي أو الإنتماء السياسي والموقف الفكري " , والتمتع بالمواطنة يترتب عليه سلسلة من الحقوق والواجبات ترتكز على أربع قيم محورية:

1 - قيمة المساواة
التي تنعكس في العديد من الحقوق مثل حق التعليم، والعمل، والجنسية، والمعاملة المتساوية أمام القانون والقضاء، واللجوء إلى الأساليب والأدوات القانونية لمواجهة موظفي الحكومة بما في هذا اللجوء إلى القضاء، والمعرفة والإلمام بتاريخ الوطن ومشاكله، والحصول على المعلومات التي تساعد على هذا.
2 - قيمة الحرية
التي تنعكس في العديد من الحقوق مثل حرية الاعتقاد وممارسة الشعائر الدينية، وحرية التنقل داخل الوطن، وحق الحديث والمناقشة بحرية مع الآخرين حول مشكلات المجتمع ومستقبله، وحرية تأييد أو الاحتجاج على قضية أو موقف أو سياسة ما، حتى لو كان هذا الاحتجاج موجها ضد الحكومة، وحرية المشاركة في المؤتمرات أو اللقاءات ذات الطابع الاجتماعي أو السياسي.
3 - قيمة المشاركة
التي تتضمن العديد من الحقوق مثل الحق في تنظيم حملات الضغط السلمي على الحكومة أو بعض المسئولين لتغير سياستها أو برامجها أو بعض قراراتها، وممارسة كل أشكال الاحتجاج السلمي المنظم مثل التظاهر والإضراب كما ينظمها القانون، والتصويت في الانتخابات العامة بكافة أشكالها، وتأسيس أو الاشتراك في الأحزاب السياسية أو الجمعيات أو أي تنظيمات أخرى تعمل لخدمة المجتمع أو لخدمة بعض أفراده، والترشيح في الانتخابات العامة بكافة أشكالها.
4 - المسئولية الاجتماعية
التي تتضمن العديد من الواجبات مثل واجب دفع الضرائب، وتأدية الخدمة العسكرية للوطن، واحترام القانون، واحترم حرية وخصوصية الآخرين.

إذن لو تحققت هذة الشروط في بلد ما لإنسان ما , أصبح هذا الإنسان "مواطن" في هذا "الوطن" وعليه الإلتزام والتمتع بـ"المواطنة" , والعكس صحيح بما لا أدنى شك فيه , إذا لم تتحقق لك هذة الشروط في البلد إللي انت عايش فيها , يبئه انت مش مواطن ولا ده وطنك , مش عشان اتولدت في البلد دي ومعاك جنسية البلد دي بالتبعية والوراثة واتربيت على كلمات خبيثة زي " كل بلاد الدنيا جميلة لكن أجمل من بلدي لا لا لا " وغيرها من بدع وافتكاسات ما يطلق عليه " الأغاني الوطنية " وإللي هى حاجة مش موجودة في الدنيا كلها إلا في الوطن العربي , يبئه انت ملزم إن يكون ده وطنك وانك تاخد لقب مش بتاعك ولا استوفيت شروطه وهو لقب "مواطن"!!!

انت بتعيش مرة واحدة بس على كوكب الأرض , ولما تموت ربنا هيحاسبك على أفعالك الطيبة وعلى ذنوبك , ومغادرتك لمكان عشان تعيش في مكان تاني مش هتغضب فيه ربنا , دي حاجة ربنا مش هيحاسبك عليها , ومش هتتحاسب على ما نطلق عليه " بعت بلدك ووطنك " , يعني لازم الواحد يشوف الدنيا إلا ربنا خلقها ويتمتع بيها كأرض , ويتمتع بمعاملة الناس الجيدة والمحترمة إللي ربنا خلقهم ودول بني آدمين زينا , بغض النظر عن الدين والجنس , وربنا كان قادر إنه يخلقهم كلهم دين واحد وجنسية ولغة واحدة , يعني لو في مكان تاني انت شايف إنه أحسن من المكان إللي انت عايش فيه , وظروفك وإمكانياتك تسمحلك إنك تروح المكان ده , لازم تروح فورا , الحياة دي مرة واحدة بس , يعني لازم تعيش وتتبسط في المكان النضيف والجميل.

ولازم يا جماعة نتخلص من البدعة الخبيثة إللي إسمها " الأغاني الوطنية " , البدعة دي مش موجودة غير في الوطن العربي بس , إللي بيمجد في الملوك والرؤساء وإنجازتهم , وياعيني على إنجازتهم , الأغنية الوطنية تلائيهم بيصورا مدخنة بتطلع هباب وسير في مصنع بتجري عليه علب لبن واكياس مسحوق غسيل , قال يعني ده دليل على الرقي والتقدم وانهم عملوا حاجة محدش عملها , هديكوا مثال بسيط جدا جدا على إن بدعة الأغاني الوطنية دي , تعتبر زي المخدرات والأفيون إللي بينيم الشعوب , الصورة دي 

وهى عبارة كوبري بين الدنمارك والسويد , بدايته كوبري ونهايته نفق تحت المياه وفي النص جزيرة صناعية , حاجة مبهرة جدا واتعلمت ولا اتعمل عليها أغاني وطنية ولا شادية جت قالت " أصله معداش عالكوبري " ولا جابوا رئيس الدنمارك واتصور وهو واقف ومشبك صوابعه في بعض ;) , وطبعا الأمثلة لا تحصى ولا تعد في العالم كله , وكل واحد فيكوا ممكن يقول خمسين مثل على إنجازات البلاد الأخرى وإللي بتتعمل والمواطنين بيستمتعوا بيها من غير ما يضحك عليهم بكلام فاضي وفارغ , وبيحسوا بالمواطنة الحقيقية فعلا.

وهى دي الحياة وهى دي الدنيا , نشغل عقلنا ونحرك عيونا على الدنيا والناس , ونشوف سعادتنا فين.

ملحوظة هامة: أن لا أقصد بكلامي هو تشجيع الهجرة خارج مصر , ممكن يكون الإنتقال داخليا داخل مصر من محافظة لمحافظة , أو تكون الهجرة "فكرية" أي تكون هجرة داخل الإنسان فينتقل بفكره من رأي لرأي أخر من ثقافة لثقافة أخرى أكثر تفتحا وأكثر تقدما , أو يكون الكلام حافز على تحقيق شروط المواطنة من المواطن والحاكم ,وأكرر أنا لا أشجع على الهجرة خارج مصر ولا أقلل من شأنها , فهى بلد حضارة الفراعنة وقدماء المصريين واللذيين لانزال نتعلم منهم ونكتشف عظمتهم وعلمهم المتقدم , مصر بلد بحاجة لمن يبنيها ويرفع من شأنها , وعلى كل من يجد في نفسه الرغبة والقدرة على العمل من أجلها ألا يتأخر أو يتوانى عن فعل ما يستطيع.

وفقنا الله جميعا لما فيه الخير

الفئة: مقالات عامه | أضاف: عزام (2011-06-05)
مشاهده: 1174 | تعليقات: 1 | الترتيب: 0.0/0
مجموع التعليقات: 1
1 البرنس  
0
كل يوم تسمع كلام وطني ,,, حوار وطني ,,, وفاق وطني ,,, المؤتمر وطني ,,, المنتخب وطني ,,, الكلمه للوطني ,,, النشيد وطني ,,, الغنوه بالوطني ,,, حتي الفراخ وطني ,,, مش المحكمه حلت الوطني ؟؟؟!!! فضوها بقي سيره ,,, ما خلاص انسرق وطني ,,,, ودورا علي اسم تاني لوطني غير الوطني !!!!!!!!!!!!!!!!!

إضافة تعليق يستطيع فقط المستخدمون المسجلون
[ التسجيل | دخول ]
دخول الاعضاء
فئة القسم
صـــوتــك اغــلى [8]
رياضه [0]
القضايا الرياضيه وكل ما يهم الرياضه
قضايا [0]
كل القضايا
فــــــــــن [3]
مقالات فنيه
مقالات عامه [46]
كل المقلات فى جميع المجلات
مقالات
المنتديات
البوم صور
تصويتنا
ما ينتقص الموقع من وجهت نظرك
مجموع الردود: 62
الارشيف
إحصائية

المتواجدون الآن: 1
زوار: 1
مستخدمين: 0